SESSIO SECUNDA.

Die decimà nonà mensis Julii, anni millesimi octingentesimi quinquagesimi, in festivitate Sancti Vincentii à Paulo, prout in Sessione primà indixerant Patres, horà matutinà sextà, in ecclesià Seminarii Majoris Burdigalensis, celebrata fuit Sessio secunda Concilii.

Ex aulà Seminarii ad ecclesiam processerant Patres et Concilii adjutores, eo ordine qui statuitur in decreto de modo vivendi in Concilio, parati omnes juxtà ea quæ præscripta fuerant, in Congregatione primà generali, de paramentis induendis.

Huic Sessioni secundæ aderat, cum nonnullis de civitatis. clero, plebis christianæ numerosus cœtus, pietate, religioneque commendabilis.

Omnibus ritè dispositis, Illustrissimus ac Reverendissimus Episcopus Rupellensis horam sacri officii tertiam cantando inchoavit. Quà absolutà, in pontificalibus celebravit missam de communi Confessoris non Pontificis, intrà quam omnes Episcopi et Presbyteri de Concilio sacram communionem de manu Pontificis celebrantis susceperunt.

Finità missà, in medio chori de more exposita sunt, juxtà

crucem archiepiscopalem, Sacra Evangelia; et Illustrissimus ac Reverendissimus Metropolitanus, Concilii Præses, ad altare procedens, ut in primà Sessione paratus, Actionem Synodalem incepit. Accuratè servatis omnibus quæ in Pontificali præscribuntur, sermonem habuit Illustrissimus DD. DUPUCH, Episcopus olim Cæsarojuliensis; quo sermone, quanti sint momenti quæ à Concilio jàm acta sunt, et quæ in futurum sunt agenda, exposuit. De S. Vincentio à Paulo etiam multa piè dixit ac luculenter; demùm, in memoriam adstantium revocavit hanc esse diem in quà animam Deo reddiderat Illustrissimus et Reverendissimus Cardinalis DE CHEVERUS, Archiepiscopus Burdigalensis.

Dein, ad instantiam D. D. Promotorum, jubente Illustrissimo ac Reverendissimo Præside, à Secretariis Concilii, altà et intelligibili voce, de suggestu ad hoc parato, lecta sunt, servatis de more servandis, quatuor capita, scilicet primum, sub titulo primo, de auctoritate Ecclesiæ; secundum, sub titulo secundo, de Ecclesiis; de earum munditie et ornatu, ac bonis ritè gerendis; tertium et quartum, sub titulo sexto, de christianá juventutis educatione et de domibus lactentium et parvulorum, vulgò dictis Crèches et Salles d'asile. Quæ singula à Patribus, successivè interrogatis, fuerunt probata.

Tandem Secretarius à Reverendissimis Patribus postulavit. utrùm probarent tertiam Sessionem fore die vigesimâ quintà ejusdem mensis, in festo Sancti Jacobi : et, annuentibus Patribus, indicta est ad hanc diem proxima Sessio. Ex tunc, ab Illustrissimo ac Reverendissimo Præside benedictione solemni acceptà, secunda illa Sessio finem habuit, omnesque Te Deum, alternis vocibus, cantantes, ad aulam Seminarii processionaliter redierunt.

CONGREGATIO GENERALIS Va.

Die decimâ nonâ mensis Julii ejusdem anni, horà quartâ pomeridianâ, in Congregatione generali consederunt, Præside Illustrissimo ac Reverendissimo Metropolitano, omnes Concilii Patres, præsentibus Canonicis et Theologis.

Inchoante hâc Congregatione, statuit Illustrissimus Metropolitanus, quandò opportunum videretur, omnium Concilii adjutorum de re controversâ expostulandam esse sententiam, qui, surgentes aut sedentes, suam mentem aperirent.

Deindè lectum fuit ab uno è Notariis, et approbatum à Patribus, instrumentum eorum quæ gesta sunt in Congregatione generali quartà.

Tùm, de mandato Illustrissimi Præsidis, lecta sunt à Secretariis sex capita, quæ sic se habent: tria, sub titulo secundo, scilicet primum, de diebus Dominicis et festis de præcepto; secundum, de festis sive suppressis, sive translatis; tertium, de Missa et Officiis divinis dignè celebrandis, ubi præcipuè de missa parochiali et de bind celebratione in eodem die. Duo decreta fuerunt, sub titulo quarto, scilicet unum, de Summo Pontifice, alterum, de Metropolitano; demùm unum, sub titulo sexto, fuit de Scholis primariis.

Propter abundantiam decretorum, circà quæ pauca tamen à Theologis fuerunt exposita, Congregatio ultrà horam assuetam producta est; finem autem habuit, more solito, per orationem Sub tuum præsidium.

Nota. Post orationem Sub tuum præsidium, edixit Illustrissimus Præses duas habendas esse die sequenti, id est sabbato, Congregationes particulares, nullam verò generalem.

CONGREGATIO GENERALIS VIa.

Die vigesima prima mensis Julii ejusdem anni, horà meridiana, in Congregatione generali consederunt, Præside Illustrissimo ac Reverendissimo Metropolitano, omnes Concilii Patres, præsentibus Canonicis et Theologis, uno è Notariis excepto, qui, infirmà valetudine impeditus, defuit.

Lecto, et à Patribus approbato, instrumento eorum quæ gesta sunt in Congregatione generali quintà, de mandato Illustrissimi Præsidis, lecta sunt à Secretariis quinque capita, scilicet duo, sub titulo primo, quorum unum fuit de pravis libris et diariis; de hæreticorum libellis ac proselytismo; alterum, de libris ab Episcopo approbandis, et de prudentia ad id necessaria; duo, sub titulo secundo, unum nempè de Cantu ecclesiastico et musicâ in Ecclesiis; et alterum, de sacrá suppellectili, et præcipuè de vasis sacris, de vasis Oleorum Sanctorum, de paramentis et linteaminibus Ecclesiæ; ultimum, sub titulo tertio, fuit de Confirmatione.

Quibus omnibus fusiùs et maturiùs perpensis, absoluta est Congregatio per orationem solitam.

CONGREGATIO GENERALIS VIIa.

Die vigesima primà mensis Julii ejusdem anni, horâ quartà, in Congregatione generali consederunt, Præside Illustrissimo ac Reverendissimo Metropolitano, omnes Concilii Patres, præsentibus Canonicis ac Theologis.

Lecto ab uno è Notariis, et approbato à Patribus, instrumento eorum quæ gesta sunt in Congregatione generali sextà, de mandato Illustrissimi Præsidis, lecta sunt à Secretariis quinque decreta: tria scilicet, sub titulo quarto, quorum primum fuit de Episcopis; secundum, de Concilio Provinciali; tertium, de Synodo diœcesaná; duo verò, sub titulo sexto, nempè de Scholis secundariis, et de Missionibus et prædicationibus extraordinariis.

Post hæc, absoluta est Congregatio de more, per orationem Sub tuum præsidium.

CONGREGATIO GENERALIS VIIIa.

Die vigesimà secundà mensis Julii ejusdem anni, horà quartà pomeridianâ, in Congregatione generali consederunt, Præside Illustrissimo Metropolitano, omnes Concilii Patres, præsentibus Canonicis ac Theologis.

Lecto ab uno è notariis, et approbato à Patribus, instrumento eorum quæ gesta sunt in Congregatione generali septimà, lecta sunt à Secretariis duo capita: unum, de Eucharistiá; alterum, de Seminariis minoribus, et studiis ecclesiasticis quæ congruunt hujusmodi institutis. Et cùm gravissimi sint momenti ea quæ tractantur in decretis istis, plures Theologi de iis varia, pro suà opinione, proposuerunt, quæ à Secretariis, mandante Illustrissimo Præside, annotata sunt, ut jàm factum fuerat in præcedentibus Congregationibus.

Post hæc, absoluta est Congregatio more solito.