Sayfadaki görseller
PDF
ePub

A. C. M.DC.XCV.

ARGUMENTUM.

1. Octogenarii senis, nivalem traham iuveniliter per Bursam ter circumagentis, amoenum spectaculum. II. Dux Bavarus cum sponsa Polona laetanter excipitur. III. Spectat cimelia ad sortem proposita: conditiones ipsius sortitionis probat. IV. Academiae exercitia. V. Moritur Gubernator castri. VI. Initiatur novum in Curia altare. VII. Baptizatur solemniter Dux iuvenis Arschotanus cum sorore. VIII. Dealbatur denuo tota Basilica Mariana. IX-XIX. Ea occasione proponitur iconismus prospectus interioris, chororumque et sacellorum ratio accurata redditur, secundum praesentem statum. XX. Vini Francici ingens caritas. XXI. Enormis elevatio Scaldis supra terram.

ACTA PRIORA.

I. CUM Ianuario mense delapsa coelo copiosissima nix solitoque constantior, nobilem iuventutem invitaret ad suam in agendis celerrimo cursu equis dexteritatem probandam, ac tota passim urbe volitarent trabae, singulae puella aliqua honoratiori, sed larvata onustae, sedente post tergum quasi ad puppim rectore consimilis aetatis; rem hactenus intentatam excogitavit D. Theodorus Verbrugge, in grandi octoginta annorum senio vegetus, trahamque suam, trans obices positos ad singulas Bursae portas, famulorum ope levatam, induxit in quadratae porticus aream, terque circum eam cucurrit, quod iunior nullus tentare ausus fuisset, praecurrente, ad viam aperiendam, turbamque sub porticus cogendam, equite alio. Res mira et digna visa, cuius mox imago, encausto expressa, per Belgium spargeretur.

II. Serenissimus Bavariae Dux, eiusdem Ianuarii die 1x

sub quintam vespertinam advenit, cum nova sua sponsa, Poloniae Regis, Ioannis Sobieski, filia, THERESIA CUNIGUNDE; ex Gelria, ubi ipsam exceperat in sinistra Rheni ripa, atque huc Turnhouto in rheda transvexerat. Exceptus est autem solito Magistratus occursu ad portam Kipdorpiam, indeque deductus ad hospitium, quod sibi in Mera e regione Minimorum parari iusserat, in vacua tunc domo Domini de Castro, quondam Baronis de Rodes, vulgo Parvi-Regis. Postridie sub meridiem ambo Duces accesserunt ad Cathedralem, Sacrum audituri, quod ipsis Episcopus legit, musica succinente.

III. Post prandium, in suo hospitio sumptum, et rhedarium circuitum, ascenderunt Duces ad superiorem Bursae ambitum, ubi spectaverunt ingeniose disposita omnis generis cimelia, quae a praelaudato Henrico van Soest, fabro ebenario curiosissimo, cum facultate ipsius Ducis et Magistratus, proponebantur conferentibus pecunias ad sortitionem illorum; ex quibus quid deinde et quanti pretii cuilibet obtigerit, docet libellus ea de re vulgatus, cum programmate conditionum, in ea sortitione utrimque servandarum. Quoniam autem eiusmodi sortitionum, variis occasionibus permissarum, hic facta est mentio, iuvat ipsum programma, ex vernaculo Latine redditum, hic exhibere legendum.

1. In primis, ad plenam uniuscuiusque in sortitionem venturi assecurationem, et omnem fraudis suspicionem removendam, ex Collegio Senatorum a Consulibus et Scabinis designabuntur Commissarii duo, universam sortitionem directuri.

u. Praemia omnia, sortitioni subiicienda, aestimabuntur ex iudicio et consensu praedictorum Commissariorum : simul autem omnia habebunt valorem aequalem toti massae sortium in urnam mittendarum, salvo quarto nummo in centum, erogando in pauperes et impendendo necessariis ipsius sortitionis sumptibus.

III. Praemia ipsa erunt omnis generis cimelia rariora et pretiosiora, eum in finem confecta aut collecta a longo tempore, formae ac modi recentioris et maioris: in quibus integrorum conclavium peripetasmata et tapetia recentissimae fabricae, quaedam etiam auro intexto splendidiora, ex designationibus recentioribus et elegantioribus; telae seu stragula mensarum atque lectorum pro quantaevis conditionis matronis, cum omnibus eo necessariis. Serinia varii generis, quorum multa encausti ac coelaturae variae, operis emblematici, picturae originariae famosorum Pictorum, puta Rubenii, Van Dyck, Quintini Massii et aliorum, item adamantes, uniones, gemmae innumerabiles, nec facile sigillatim exprimendae; tales autem, ut cuiuscumque generis et conditionis personae reperturae sint genio suo accommoda in hac sortitione, qualis numquam in Belgio exposita fuit, sive pretia praemiorum spectes, sive commoditatem conditionum publico utilium. Servabuntur autem omnia in superiori ambitu et conclavibus Bursae Antverpiensis, vulgabunturque libelli, singulorum praemiorum pretia exponentes.

IV. Cuiuscumque generis personae, tam indigenae quam externae, assument sortes quam multas videbitur, vel sibi solis vel aliis secum associatis, solvendo in singulas schellingos quatuor monetae Regiae, sive viginti sex stuferos pretii currentis.

v. Sortes ipsae distribuentur supra Bursam ad latus meridionale, signatae suo quaeque numero, et in registrum relatae per homines fidos et rei praepositos; qui istic considebunt, mane ab hora xi usque ad meridiem, atque post hanc ab hora iv usque ad v cum dimidia. Ibi accipietur pecunia; quam accipiens, datori tradet syngrapham acceptationis. Omnes autem sortes, quibus tam praemia quam nullitates inscriptae erunt, reponentur in cistam ligneam, vinculis ferreis probe

munitam, nec umquam aperiendam nisi per claves diversae formae tres, insimul conferendas; quarum duae erunt sub manibus Dominorum Directorum, tertia penes praefatum van Soest.

VI. Ante distributionem praemiorum, omnium eorum qui sortes acceptarunt nomina, inscripta unius formae chartulis, numero et proportione singulorum notatis, reponentur in aliam ligneam cistam eiusdem cum priori fabricae, et utrique immissae schedae diligenter concutientur miscebunturque, ne qua fraus latere possit, aut eius suspicio suboriri et ingenuus aliquis adolescentulus extrahet e cista nominum schedam unam, et ex adverso alius ex cista praemiorum ac nullitatum schedam alteram : atque ita porro usque ad finem.

VII. Huiusmodi extractio expositioque schedarum fiet, quam primum collecta fuerit congrua summa pecuniae ad distributionem requisitae quam si contingat iusto minorem inveniri, non differetur praemiorum distributio ultra xxv. Martii anni huius M.DC.XCV. et tali casu Commissarii minuent pretia praemiorum cum proportione ad defectum.

VIII. Is cui prima sors obtinget, sive praemium sortiatur sive nihil, accipiet in specie centum ducatones; et cui ultima, pattacones centum : qui plurimas sortes emerit, sive sub sui unius seu plurium nomine, lucrabitur centum ducatones, sive sortes illas acceperit simul, sive pluribus successive vicibus. IX. Qui vero post illum plures emerit, ducatones quinquaginta.

x. Qui denique post duos illos, viginti quinque.

XI. Quod si contingat ex illis tribus duos eumdem numerum sortium emisse, promissa summa obveniet ei qui iuxta registrum invenietur prior nomen suum dedisse.

XII. Quicumque simul et semel viginti quinque sortes emerit, unam supernumerariam extrahet, ita ut accipiat viginti sex.

XIII. Quotidie etiam palam enuntiabitur quis quod praemium sortitus sit.

XIV. Denique ad maiorem sortientium securitatem, declarabitur iis, quibus monilia vel alia eius generis praemia obvenerint, quanti ea fuerint aestimata, cum registro inscriberentur; ut, si maluerint praemii illius valorem in pecunia accipere, hic ipsis solvatur cum defalcatione decem in centum.

XV. Quicumque vicinarum aut remotiorum etiam locorum incolae concurrere ad hanc sortitionem voluerint, neque Antverpiae habuerint certum correspondentem, poterunt pecuniam suo nomine sorti committendam per tabellarium publicum dirigere ad commissarios in Bursa; qui, ea accepta, acceptationis suae syngrapham tradent, cum nota ipsius sortis. Bruxellis autem sufficiet illam sic tradendam curare D. Ferdinando Picourt, commoranti in via vulgo de BERGSTRAET.

IV. Quem ea res successum habuerit, non est huius loci nec instituti mei curiosius indagare aut explicare; redeo ad Ducem, omnium inspectorem, approbatorem et admiratorem; qui inde processit ad Academiam, ubi stabat nudus Hercules, leonina accinctus pelle et clava instructus, a tironibus per circuitum sedentibus delineandus; quo modo in Academia minori iuvenculorum stabat in medio puella, Palladem referens, similiter delineanda. Singulorum sedulitatem inspexerunt et laudaverunt Duces; moxque patefactum theatrum est, in quo recitata cum plausu comoedia elegans, mire placuit.

Denique die xi Ianuarii, post auditum in meridie Sacrum apud Jesuitas, ad ornatissimum tunc altare, discessum Mechliniam est, numquam et nusquam deficiente multitudine populi, ad spectandam Ducissam accurrentis.

V. Die XXIV Ianuarii, in Castro obiit eius Gubernator D. DIDACUS GOMEZ DE ESPINOSA, cui xix Septembris, lectis in Collegio Senatorum patentibus, successit Comes de CORAIAL.

« ÖncekiDevam »