15". POSTULATUM

DE CONFORMITATE ET UNITATE IN RECITANDO HORAS CANONICAS AC CELEBRANDO MISSAM.

"

Identitas ac unitas Ecclesiae prorsus requirit identitatem ac unitatem fidei, dicente Apostolo Unus Deus, una fides." Haec fidei et Ecclesiae unitas non profecto per se expetit identitatem ac materialem unitatem verborum in orando. Sed quam porro exoptandum foret, ut in unisona voce omnium Ecclesiasticorum per orbem, dum septies in diem laudem dicunt Deo, esset unum cor, unum os, una et eadem praedicatio (ut verbis utar S. Iren. lib. 1. cap. 10.)? et dum una est fides mentium et pietas actionum, una etiam foret supplicatio verborum? Ex eo procul dubio eveniret, quod confidentius, digniusque, ac, dicam, verius, respondere possemus objurgatoribus Ecclesiae Catholicae Catholici dicimur, quia corde credimus, ore confitemur, et ad salutem adprecamur idem quod universus mundus." Pervetustum est adagium in Ecclesia „Formam precandi designare formam credendi."

Ad quem scopum obtinendum, non melius fortasse, in mei sententia, occurrere possumus, quam conformitatem unitatemque stabilire Horarum canonicarum in recitando Breviarium ac celebrando Missam; reformatum Breviarium ipsum, prout in votis est Episcopatus, ac etiam Concilium Tridentinum ordinaverat, proponere illud Clericis omnibus, cujuscumque ritus, cujuscumque professionis, etiam Regularibus, de praecepto recitandum. Oh! quam bonum et quam jucundum in Ecclesia Catholica, in ore omnium Ecclesiasticorum, eadem verba precationum, eosdem hymnos, eademque cantica, diversis linguis expressa, resonare!

Duo

Quid e contra evenire videmus? Quot sunt Dioeceses, et in ipsis Dioecesibus quot sunt Ordines regularium diversi, tot sunt varietates tum in recitando tum in celebrando. vel plures inveniantur Clerici extra suam Dioecesim, qui recitare habeant ac celebrare, non possunt recitare simul quia diversum pro festo habent Sanctum, non possunt iisdem paramentis ejusdem coloris celebrare, quae cum officio non concordant. Et inde confusio.

Quapropter proponerem, in universa Ecclesia saltem Latina unum idemque officium omnibus Clericis, non exclusis Regularibus, in Breviario designari, et de eo teneri unumquemque recitare Horas canonicas, celebrareque Missam, non obstantibus privilegiis quae revocantur. Quoad Sanctos vero proprios Dioe

cesium vel Ordinum Regularium, teneantur nonam lectionem recitare in matutino, in eoque et in Missa commemorationem facere, Missamque solam solemnem in die concedatur celebrari de proprio. Hoc votum, pro me, in Ecclesia esset explendum. Veruntamen haec praetuli, non ut doctor, sed ut docibilis Ecclesiae filius, ac pro non dicto habeo, haberique volo, si fortasse non esset dicendum vel probandum.

Fr. Raphael Ricca Generalis Mmorum.

Dat. Romae ex Conv. S. Andreae de fractis hac die 30. Januarii 1870.

15. POSTULATUM

SANCTISSIMUM NOMEN JESU ATTINENS.

Venerabiles Patres!

„Ex quo elapsi aevi stultitia, philosophiae nomine tecta, sacrilego crocitu: Detruisez l'infame, SSmae JESU Christi Ecclesiae nefarium indixit bellum, facta est super nos indignatio Domini, qui exemit gladium irae suae, illum non dimissurus donec admirabile Nomen Unigeniti Filii sui omnimode clarificetur in nobis, donec formentur electi ejus, qui in frontibus suis ineffabile JESU Nomen et Nomen Patris ejus gestantes, Ipso Summo Dei Verbo dulce ac novum canticum depromant."

Jam ex tot annis, Venerabiles Patres, ego ita loquebar, 1) quando ad repellendas procellas in Petri naviculam saevientes, nec non ad litteras et scientias, multimodis deturpatas stultitiis, expurgandas, ac nova luce novaque gloria honestandas, Academiam, Deo adjuvante, instituere aggrediebar sub ineffabilis Sanctissimique Nominis JESU_praesidio firmissimo ac tutela. Ex tunc enim, Venerabiles Patres, etiam ex tunc in amaritudine cordis terram opertam videbam errorum omnium atque blasphemiarum colluvie, quae insaniente pelago ventisque saevientibus, etiam italam gentem in procellam tenebrarum

1) Servatur in Archiviis Sacrae Rituum Congregationis postulatio quam olim Auctor deferebat Domino Gregorio PP. Decimo Sexto pro nova Praefatione in Missa SS. Nominis JESU adprobanda: qua postulatione excipi petebatur SS. Nomen a generica norma a S. R. C. accepta novas praefationes ultro non concedendi.

obruere conabatur. Et jam temporibus hisce, adhuc gladio Domini exempto, procella illa tenebrarum advenit; ecce eheu quot hominum millia ipsa illidit miserrimeque contundit! Et quidem illam a longe aspiciens, cum adhuc essem in patria, et ibi cum adjutoribus meis in hac Academia in minimis Sacerdotio fungeremur, scientes depositum patriae catholicaeque fidei nobis sacerdotibus creditum, in gemitibus inenarrabilibus patuit cor nostrum ad Deum, et auxilium ejus enixe implorantes, iterum atque iterum ex tunc clamabamus: Domine salva nos, perimus! Et Deus adjuvit nos, locutusque est nobis; nos audivimus eum arcana verba per apostolum loquentem: Proposuit Deus in dispensatione plenitudinis temporum omnia instaurare quae in coelis et quae in terra sunt in JESU. Audivimus, et laetati sumus, et superabundavimus gaudio, et in Verbo Domini die ac nocte meditantes, in meditatione nostra ignis charitatis exarsit, scientes quod in Nomine JESU omnia instaurarentur. Tunc recordati sumus vocatum fuisse Nomen ejus JESUM, eo quod ipse salvum faciet populum suum a peccatis eorum. Et iterum: Non est in alio aliquo salus, nec aliud Nomen datum est hominibus, in quo oporteat nos salvos fieri. Idcirco hilari promptoque animo adgressi fuimus praefatam Academiam instituere, per quam laus plena decoraque sanctissimo Nomini JESU totam per Italiam nostram reboaret. Non est mihi mens, Venerabiles Patres, nomina referre clarissimorum virorum, qui huic Academiae subscripserunt, quorum plurimi decus atque maxima gloria Religionis et patriae nostrae ad Episcopatum evecti, nunc in Nomine JESU nobiscum congregati, hanc sanctam Synodum decorant, et nos illorum subscriptiones accurate usque in hanc diem servavimus. Benedixitque Dominus humilibus obsequiis laboribusque nostris, et in annos undeviginti sub auspicatissimis praesidiis tum Pii PP. octavi tum Gregorii PP. decimi sexti, tum alicujus ex clarioribus viris, quibus eam dicavimus, bene prospereque Academia nostra processit, perque eam repleta est terra nostra laude jucundissima Nominis JESU; at Nomen JESU in hac nostra Academia clarificatum clarificavit eamdem. Ipsa namque ab eodem sanctissimo Nomine, quod prae se ferebat erecta, a summis Pontificibus, a Neapolitanis Archiepiscopis, nec non ab utriusque Siciliae Rege adprobata per omnes Italiae civitates honorifice dilatabatur. Et ego gloriabar in Domino propter Sanctissimum JESU Nomen in Academia, et Academiam in Sanctissimo JESU Nomine tam mire clarificatam. Et ecce, Venerabiles Patres, post aliquot annos facta est super me Manus Domini tollens me e gremio fratrum et ponens Episcopum regere lectissimam partem Ecclesiae Dei quam acquisivit sanguine suo. Tunc e modio

sublatus humilitatis meae, et super Candelabrum positus ut mea lux coram dilectissimis in Christo filiis luceret, ante omnia curavi lucernam accendere in Camino ignis ardentis, in Lumine vero, in Nomine JESU, et facta est prima vox episcopalis mea ipsa, quae praedictae Academiae Tessera fuerat: „Sciant gentes quia Nomen tibi JESUS."

Accedit, Venerabiles Patres, quod ex prima die institutionis Academiae nostrae ardens erat in cor nostrum desiderium ut in Missa Sanctissimi Nominis JESU nova atque propria, ad augendam ejusdem Admirabilis Nominis gloriam adderetur Praefatio. Et ecce, talia me cogitante, nova Praefatio ex corde meo prosiliit, et ex corde ad os saliens, laetus exultansque cantavi:

Vere dignum etc. Sancte Pater, omnipotens aeterne Deus. Qui Unigenito Filio tuo in assumptae humanitatis veritate nobis nato, Sacratissimum JESU Nomen, quod est super omne nomen, aeterno consilio donasti. Ipse enim pio Cruore vetus nostrum detersit piaculum, et Crucis supplicio, morte triumphata, humanum genus perfecta filiorum adoptione e perpetua captivitate liberavit. Quapropter Nomini JESU sanctissimo coelestium, terrestrium et infernorum omne flectitur genu, et ad dexteram tuam verum Deum verumque hominem super omnia, quae per ipsum fecisti, JESUM regnare socia professione confitemur. Sed et supernae Virtutes atque angelicae Potestates in hoc unico salvationis Nomine gloriantes hymnum Majestati tuae concinunt sine fine dicentes.

Venerabiles Patres, Deus investigabilis in viis suis, et in judiciis incomprehensibilis atque sapientissimus, postulationes precesque nostras tum Pio PP. octavo per Eminentissimum Ruffo Scilla Neapolitanum Archiepiscopum, tum post temporis elapsum per successorem ejus Eminentissimum Caracciolo Gregorio PP. decimo sexto delatas, noluit ut nostram probaret constantiam cito exaudire. Sacra enim Rituum Congregatio statuerat, ultra in Missis novas praefationes non addere.

1

At nunc, Venerabiles Patres, levate oculos vestros; ecce quot percrebescentia mala, quae minitantur penitus christianam et civilem societatem evertere! Ecce filii Belial exultantes quasi victores capta praeda, quando dividunt spolia, regionibus nostris olim Naviculae Petri addictissimis nova dogmata novasque doctrinas invexerunt! Ecce, horresco referens, impius Renanus sacrilege blasphemat, et illius blasphemiis socii ejus plaudunt, illasque repetunt, et granum fidei e cordibus fidelium evellere conantur. Luget Gallia, luget Italia Europaque luget, nam torrentes iniquitatis, corruptionis atque blasphemiae conturbaverunt Ecclesiam, totumque mundum in gurgitibus suis jam jam absorbent. Adhuc Manus Domini extenta, adhuc

gladius ejus evaginatus non reponetur nisi Sanctissimum JESU Nomen mirifice fuerit clarificatum. Deus enim proposuit in dispensatione plenitudinis temporum omnia instaurare in JESU. Quapropter nuper adivimus sanctissimum invictissimumque Dominum Pium Papam nonum, qui inter omnes clarissimus extat praeco gloriarum sanctissimi Nominis, et Ipse clementer nobis indulsit ut de nova hac Praefatione cum Sancta Synodo agamus. Pensate, Venerabiles Patres, quanti referat admirabile Nomen novis praeconiis novisque laudibus celebrare. Impietatis fluctus tumentes omnino conantur sacrilego ausu hoc Augustissimum Nomen delere. Quod indicitur nefarium bellum Ecclesiae, dogmati, Sacerdotio atque Petro conatus impietatis est, quae, arrepto gladio cupit, sublatis Religionis exercitibus, ad ipsam delendam ruere. At illa supra fidem innixa, in charitate vivens, sanctissimo Nomine JESU honestatur in fronte. Oh saecule nequam quamdiu finis turpitudinis tuae? Eja Venerabiles Patres, in Nomine JESU nos hic congregati, in sacris etiam Liturgiis hoc sanctissimum Nomen invocemus; adprobetur haec nova Praefatio, ut ubique terrarum et a solis ortu usque ad occasum JESU dulcissimum ac suavissimum Nomen resonet, et Nomen JESU, quod omnia dogmata in se totamque catholicam fidem complectitur erit inter missarum solemnia solemnis totius Evangelii professio. Idcirco novo lumine Religio nostra radiabit, claritas enim hujus sanctissimi nominis circumfulgebit eam; impietas videbit et irascetur, dentibus suis fremet et tabescet, desiderium peccatorum peribit, et in memoria aeterna erit Vaticana Synodus decorata Nomine JESU donec oblatio munda totum per terrarum orbem ad finem usque saeculorum fuerit oblata. Etiam, etiam sic. Veniat ergo in cor nostrum JESUS, sic tandem vos alloquor cum divo Bernardo, veniat in cor nostrum JESUS, et inde saliat in os, et ecce ad exortum Nominis lumen nubilum omne diffugit redit serenum. O JESU, spes suspirantis Ecclesiae, o Nomen super omne Nomen!

Nostis, Venerabiles Patres, quod olim filii Chanaan cogitantes cogitationes nequitiae dixerunt ad invicem loquentes contra Dominum: Faciamus civitatem et turrim, cujus culmen pertingat ad coelum, celebremus nomen nostrum antequam dividamur in gentes. Si licet flagitiosas locutiones in verba vitae convertere sinite mihi praefatis verbis vos alloqui: Faciamus nobis civitatem et turrim, cujus culmen pertingat ad coelum. Sit Nomen JESU Civitas atque Turris nostra. Deus congregavit nos in hac Urbe Sancta ex omnibus etiam dissitis nationibus, ex omni gente, et populo et lingua, et posuit fecitque nos Deo nostro Regnum, ut evellamus, destruamus, evertamus, aedificemus, plantemus et in sanctissimo JESU Nomine