EX S. CONGREGATIONE CONCILII

CIRCA APPLICATIONEM SECUNDAE MISSAE.

PER SUMMARIA PRECUM.

Die 14 septembris 1878.

Compendium facti. Episcopus N. in Gallia, exposuit ab anno 1842 institutam fuisse in sua Dioecesi Sacerdotum Congregationem S. Iosephi, indulgentia a S. Sede ditatam, cuius sodales semel, pro unoquoque sacerdote confratre defuncto, Missam celebrare debent. Sacerdotes, quibus binare concessum est diebus Dominicis et festis, secundam litarunt Missam pro defunctis confratribus, arbitrantes id se facere posse tuta conscientia. Attamen cum dubium exortum fuerit circa eiusmodi agendi modum, Ordinarius quaesivit: an Missa binationis offerri possit, ut in casu, pro defunctis Confratribus.

Disceptatio synoptica.

ARGUMENTA CONTRARIA. Ex Constitutione Bened. XIV, Cum semper oblatas, et ex constanti disciplina S. C. Concilii clare patet vetitum esse Parocho aut alii Sacerdoti Missam iteranti, quominus pro secundae Missae applicatione eleemosynam percipiat. Huius constantis decisionis ratio in hoc posita est ut quodlibet mercimonium a rebus sacris removeatur; et ideo nedum directa eleemosynae perceptio pro secundae Missae applicatione, sed etiam quivis praetextus percipiendi eleemosynam, et quaecumque indirecta eiusdem eleemosynae perceptio est arcenda. 1

I

1 Confer causam relatam, Vol. IX, pag. 297 et seqq.

Quibus positis, videtur sacerdotem applicare non posse secundam Missam pro confratribus defunctis: quia si non directe, saltem indirecte videtur eleemosynam percipere, dum applicans Missam pro confratre sacerdoti satisfacit obligationi cui si per se non satisfaceret vel alii stipendium rependere deberet, ut Missam illam celebraret, ad quam ipse ex obligatione tenetur dando suum nomen praedicto sodalitio, vel saltem eleemosynam Missae amittere deberet. Quare secundam Missam applicando saltem rebus suis parceret, et ita indirecte eleemosynam reciperet.

ARGUMENTA FAVORABILIA. Ex altera vero parte perpendendum est quod secundam Missam applicando pro confratribus defunctis, Sacerdos eleemosynam nec directe, nec indirecte percipit. Non directe, quia in facto nihil recepit; non indirecte, nam ad ipsam applicandam adstringitur non iustitiae, sed charitatis vinculo. Unde cum nulla lex prohibitiva reperiatur, quae secundam Missam applicare prohibeat pro sua devotione, vel pro suis defunctis aut animabus in Purgatorio degentibus, nihil vetare videtur quominus pro suffraganda confratris defuncti anima secundum applicet sacrificium. Notum enim in iure est, quod illud censetur permissum, quod non est a iure prohibitum.

Hisce praeiactis, prudentiae Emorum Cardinalium remissum fuit perpendere, quonam responso dimittendum fuisset propositum dubium.

RESOLUTIO. S. Congregatio Concilii, visis videndis, sub die 14 septembris 1878 respondere censuit: << Licere >.

EX QUIBUS COLLIGES:

I. Ex hac etiam resolutione sartam tectamque, nobis videtur, manere tum S. C. Concilii maximam, tum dispositionem Bened. XIV in Constit. Cum semper oblatas; quod nempe Sacerdos pro secunda Missa, nullam recipere possit eleemosynam neque directo neque indirecto.

II. Huius constantis inhibitionis rationem in hoc positam esse ut omnis avaritia, omnisque etiam mercimonii suspicio a rebus sacris arceatur.

III. Intentionem principalem disponentis (quam semper in applicatione legis attendere oportet) esse ut prospiciatur potius disciplinae ecclesiasticae robori, quam Sacerdotum utilitati. '

I

IV. In themate nullimode sive directe sive indirecte eleemosynam percipi a Sacerdotibus secundam litantibus Missam pro confratribus defunctis, ideoque eisdem licere id peragere: quia nullum ius prohibet ut quis secundam applicet Missam pro illis, erga quos non lege iustitiae, sed vinculo charitatis tantum obstringitur.

Quoties S. Congregatio Concilii interpretata est Constit. Bened. XIV, Quod expensis in qua loquitur Pontifex de prohibitione recipiendae eleemosynae pro secunda aut tertia Missa, eamdem tenuit praxim. Huius rigoris specimen dedit S. Congregatio in Trevirensi eleemos. 23 martii 1861. Quae relata fuit, Vol. I, pag. 13. Agebatur in ea de Missa secunda celebranda cum gravi incommodo, et consuetudo ferebat ut eleemosyna pro hac secunda missa ex quibusdam beneficiis perciperetur: attamen S. Congregatio edixit; solummodo posse permitti prudenti arbitrio Episcopi, aliquam remunerationem, intuitu laboris et incommodi, exclusa qualibet eleemosyna pro applicatione Missae.

EX S. CONGREGATIONE INDICIS

DECRETUM.

Feria II die 16 septembris 1878.

Sacra Congregatio Eminentissimorum ac Reverendissimorum Sanctae Romanae Ecclesiae Cardinalium a SANCTISSIMO DOMINO NOSTRO LEONE PAPA XIII Sanctaque Sede Apostolica Indici librorum pravae doctrinae eorumdemque proscriptioni, expurgationi, ac permissioni, in universa christiana Republica praepositorum et delegatorum, habita in Palatio Apostolico Vaticano die 1 iulii an. 1878 damnavit et damnat, proscripsit proscribitque, vel alias damnata atque proscripta in Indicem librorum prohibitorum referri mandavit et mandat quae sequuntur Opera.

Gioia Gio. Battista cav. prof. Esposizione critica della Genesi. Roma, tip. Mugnoz, 1877.

Scholl Aurélien. Le procès de Jésus-Christ. Paris, Maurice Dreyfous éditeur.

Larroque Patrice. Religion et Politique, études supplémentaires et lettres précédées d'une notice biographique. Paris Calman Lévy éditeur, 1878.

Giacomo (P.) del S. Cuor di Maria. Nuovo Saggio intorno all'azione di Dio sulla libertà dell'uomo secondo la vera dottrina di S. Tommaso. Napoli, tip. della R. Accademia delle scienze fisiche e matematiche, 1877. Decr. S. Off., fer. IV, 14 augusti 1878.

Giacomo (P.). Il nuovo Saggio intorno all'azione di Dio, ecc., difeso dall'Autore. Napoli, tipografia dell' Accademia delle

scienze, ecc. 1878. Eod. Decr. Auctor laudabiliter se subiecit et opus reprobavit.

Itaque nemo cuiuscumque gradus et conditionis praedicta Opera damnata atque proscripta, quocumque loco, et quocumque idiomate, aut in posterum edere, aut edita legere vel retinere audeat, sed locorum Ordinariis, aut haereticae pravitatis Inquisitoribus ea tradere teneatur sub poenis in Indice librorum vetitorum indictis.

Quibus Sanctissimo Domino Nostro LEONI PAPAE XIII per me infrascriptum S. I. C. a Secretis relatis, Sanctitas Sua Decretum probavit, et promulgari praecepit. In quorum fidem, etc.

Datum Romae, die 20 septembris 1878.

Fr. THOMAS MARIA Card. MARTINELLI, Praefectus.

L. S.

Fr. Hieronymus Pius Saccheri, Ord. Praed.,

S. Ind. Congreg. a Secretis.

Die 24 septembris 1878, ego infrascriptus magister Cursorum testor supradictum Decretum affixum et publicatum fuisse in Urbe.

Philippus Ossani, Mag. Curs.