IMPRIMATUR: Fr. ALBERTUS LEPIDI, O. P., S. P. Ap. Magister. IMPRIMATUR: IOSEPH CEPPETELLI, Patr. Const., Vicesgerens. IUS PROPRIETATIS VINDICATUR Literna 8-11-37 34492 EX VATICANO Litterae Apostolicae SS. D. N. Pii Papae IX ad ducem Salviati, aliosque e Consociatione Catholica Itala. DILECTIS FILIIS DUCI SCIPIONI SALVIATI, EQUITI TORQUATO IOANNI ACQUADERNI, ET ALIIS A CONSOCIATIONE CATHOLICA ITALA. PIUS PP. IX. DILECTI FILII, SALUTEM ET APOSTOLICAM BENEDICTIONEM. Gaudemus, Dilecti Filii, steriles non fuisse conventus vestros; nam, praeter utilitates a Veneto partas, videmus etiam a Florentino confirmatum nobile insigne vestrum fide et operibus in eo programmate, quo socios vestros excitare decrevistis ad leniendas Ecclesiae aerumnas eiusque iura legali ratione defendenda. Profecto quidquid in eo proposuistis adeo convenit desiderio Nostro, ut haud raro in publicis, quos habuimus, sermonibus eadem vota significaverimus. Gratissimum itaque Nobis erit, si quotquot nomen dederunt catholicis Italiae consociationibus petitiones, industriam, operam eo, quo par est, prudenti studio, conferant unanimi nisu ad illa assequenda; ut, adiuvante Deo, possint averti, aut mitigari saltem, tot mala, quae perniciem minitantur religioni et moribus. Fastum idcirco adprecamur exitum consilio vestro; ac interim superni favoris auspicem paternaeque benevolentiae Nostrae pignus vobis, Dilecti Filii, sodalibus vestris universis et iis omnibus qui proposito vestro suffragaturi erunt, Apostolicam Benedictionem peramanter impertimus. Datum Romae apud S. Petrum die VIII novembris anno MDCCCLXXV, Pontificatus Nostri anno tricesimo. PIUS PP. IX. Litterae Apostolicae SS. D. N. Pii Papae IX ad Archiepiscopum Taurinensem, aliosque Ordinarios. VENERABILIBUS FRATRIBUS ARCHIEPISCOPO TAURINENSI, ET EPISCOPIS PAPIENSI, AQUENSI, BOBIENS! ET DERTHONENSI. PIUS PP. IX. VENERABILES FRATRES SALUTEM ET APOSTOLICAM BENEDICTIONEM. Gratum fuit Nobis vestrae dilectionis officium, quo Nos in partem sanctae laetitiae, quam exeunte superiori mense estis experti, vocastis annunciantes Nobis fidem et religionem civium Derthonensium populique in Liguriae finibus degentis, qui praeclaro vestro exemplo et Cleri Dioecesani zelo permoti solemnia Sancti Martiani protoEpiscopi Derthonensis et Martyris pientissime celebrarunt. In hisce enim tribulationis et gravis dimicationis diebus, in tanta hostium nequitia ea quae declarant firmum vinculum quo inter se et cum Apostolica hac Sede nectuntur Ecclesiarum Pastores, quaeque Fidelium inter se caritatem et pia studia deprecandi Deum ac Sanctos Eius ostendunt, non possunt non afferre Nobis dulcem fructum consolationis. Quapropter Vobis, Venerabiles Fratres, de pio vestro conventu, simulque Clero ac Fidelibus omnibus, qui vestra exempla religiose secuti sunt, gratulamur, et pro officio quod erga Nos praestitistis gratum animum sincere profitemur. Speramus autem glorias Martyrum Christi quas devote recoluistis, uti in vobis sacerdotalis virtutis robur alunt, ita pariter apprime profuturas Populo Fideli, ut discat viriliter resistere malo, et ad eam Fidei amplitudinem assurgere, per quam Sancti vicerunt regna, operati sunt repromissiones. Hoc summis votis a Deo bonorum omnium auctore per merita Sanctorum Eius imploramus, ac in omnium gratiarum auspicium et in pignus praecipuae benevolentiae Nostrae Apostolicam Benedictionem vobis singulis universis et gregibus cuique vestrum curae concreditis peramanter in Domino impertimus. Datum Romae apud S. Petrum die x novembris anno MDCCCLXXV, Pontificatus Nostri anno tricesimo. PIUS PP. IX. Litterae Apostolicae SS. D. N. Pii Papae IX ad Sacerdotem Taurinen. Ioannem Bosco, qui primos Missionarios in Rempublicam Argentinam misit. PIUS PP. IX. DILECTE FILI, SALUTEM ET APOSTOLICAM BENEDICTIONEM. Binas litteras exeunte octobre mense a te datas libenter excepimus, et missionarios quos nobis commendabas cum dilecto filio Ioanne Baptista Gazzolo coram nobis sistentes paterna benevolentia complexi sumus. Ex eorum conspectu et alloquio aucta in nobis spes est quam fovebamus, fore ut ipsorum labores in dissitis regionibus, quo proficiscuntur, fructuosi sint et fidelibus salutares. Itaque zelum eorum laudavimus, illisque opem divinam adprecantes benediximus. Iucunde nos affecerunt quae renuntiavisti de progressu et incrementis pii operis a Maria Auxiliatrice nuncupati, et exinde etiam, favente Deo, optimos salutis fructus confidimus extituros. Interim sensus paternae dilectionis nostrae iterum tibi testamur, et auspicem coelestis gratiae apostolicam benedictionem tibi et universae Congregationi cui praees, peramanter impertimus. Datum Romae apud Sanctum Petrum, die xvii novembris MDCCCLXXV, Pontificatus Nostri anno tricesimo. PIUS PP. IX. Litterae Apostolicae SS. D. N. Pii Papae IX quibus indulgentiae concessae Sodalitati cuidam pro mulieribus conceduntur pro utrisque sexibus. PIUS PP. IX. AD PERPETUAM REI MEMORIAM. Muliebre sodalitium cui a Bña Maria Virgine Lapurdensi nomen est factum, die ш Decembris a. MDCCCLXXIII in Almae huius Urbis Ecclesia S. Mariae Virginum canonice erectum, similibus nostris die xxIII Ianuarii superiori anno datis Litteris, plenariis partialibusque Indulgentiis ditavimus. Modo autem sodalitium idem quum viris quoque sit propagatum, et ideo ex decreto Venerabilis Fratris Nostri Constantini S. R. E. Cardinalis Patrizi Episcopi Ostiensis ac Veliternensis, in Alma Urbe Vicarii Nostri in spiritualibus Generalis, die xx augusti huiusce anni vertentis edito, nova utriusque sexus sodalitas in eadem Ecclesia et sub eodem titulo ita sit instituta ut integra sodalitas ab ecclesiastico Moderatore gubernetur, sodales autem viri Antistitem virum, mulierem Antistitam sodales mulieres iuxta eiusdem sodalitatis leges eligendos habeant, supplicatum Nobis est, ut huic novae sodalitati easdem Indulgentias, quibus per supradictas, Litteras Nostras muliebre sodalitium ditavimus, concedere, novamque sodalitatem hanc Archisodalitatis titulo ac privilegiis de Apostolica Auctoritate Nostra augere velimus. Quare Nos quibus vel maxime cordi est, ut pietas |