SANCTAE SEDIS IN COMPENDIUM OPPORTUNE REDACTA ET ILLUSTRATA SEU Acta iuridica et solemniora ex Supremo Romano Pontifice immediate dimanantia: acta Volumen II. ROMAE TYPIS POLYGLOTTAE OFFICINAE S. C. DE PROPAGANDA FIDE MDCCCLXXXII. EX ACTIS CONSISTORIALIBUS. Die xxv. Iunii Beatissimus Pater in Consistorio publico in aedibus Vaticanis habito, obedientiae testimonio et iuramento a recens creatis Cardinalibus iuxta praescriptas formulas excepto, illos cardinalitio pileo donavit: tum caeteris consuetis coeremoniis expletis, consistorium secretum habuit; in quo Eminentissimos Patres omnes adlocutus est, expromens, praeter caetera, animi sui desiderium Beatos Martyres Gorcomienses, et Beatam Mariam Franciscam a quinque I. Christi Domini nostri Vulneribus in Albo Sanctorum adscribendi. Quapropter Emum ac Rmum D. Card. C. Patrizi, Episcopum Portus et S. Ruphinae, uti S. R. Congr. Praefectum, eorumdem Beatorum causas in summa referre iussit, ut causa cognita Patres ferre sententiam possent. Tum Emus S. R. C. Praefectus retulit primum de Beatis Martyribus Gorcomiensibus, qui fuerunt: Nicolaus Pic, Hieronymus Werden, Theodoricus de Embden, Nicasius Johnson, Wilhadus de Dania, Goffredus de Merveille, Antonius de Werden, Antonius de Hornaire, Franciscus Rhodes de Bruxellis, omnes Sacerdotes Ordinis Minorum Observantium S. Francisci, et Petrus de Asca et Cornelius de Dorestate Laici eiusdem Ordinis. Praeterea Ioannes Sacerdos Ordinis S. Dominici, et Hadrianus de Hilvarenbeck et lacobus Lacop Monachi Praemonstratenses: Ioannes Ostervican Canonicus Regularis Ordinis S. Augustini; Leonardus Wichel, Nicolaus Poppel, Goffredus de Gorcum, et Andreas Valter, Sacerdotes saeculares et Parochi. Horum decem ac novem Beatorum Martyrium paucis exposuit, quod contigit die x. Iulii ann. MDLXXII., cuius quidem causa fuit odium quo in Catholicam Religionem Calviniani Hollandiae, qui illos interemerunt, exardebant. Tum etiam retulit de prodigiis, quae eorumdem Beatorum Martyrum intercessione patraverat Deus: tum denique anacephaleosim summatim exhibuit eorum quae in Causae confectione acta fuerant. |