PROOEMIUM

Hic liber Confraternitatis clarissimorum virorum nomina continens tamquam fons rerum Germanicarum dignus est, qui talis qualis est typis edatur ». Quae verba, ut in transcribendo codice cum codicillo exordiar, Rmus D. Sebastianus Brunnerus ultima pagina huius libri sua manu inscripsit XV. Kal. Mai. 1873 vota repetens cunctorum qui librum ipsum inspexere.

Nec deerant qui desiderio adeo iusto ut satisfieret adlaborarent; ast operis mole perterriti ab incepto destitere, si Aloisium Flirum excipias, qui ingenio aeque ac patientia superans omnes maximam partem codicis nostri sua manu transcripsit.

Quod quidem exemplar licet haud omnibus numeris sit absolutum, ita tamen me iuvit, ut praedecessori meo immatura morte abrepto maximas gratias agere debeam non secus ac Sacerdotibus quos laboris residui habui socios.