PIO IX PONTIFICI MAXIMO DOCTORI ET JVDICI INERRANTI A CHRISTO JESV IN ECCLESIA CONSTITVTO CVM POTESTATE IN CVNCTOS EPISCOPOS HAS LVCVBRATIONES DE SACRA HEBRAEORVM ET CHRISTIANORVM MONARCHIA ET DE INFALLIBILI IN VTRAQVE MAGISTERIO E DIVINIS SCRIPTVRIS ET PATRVM TRADITIONIBVS ERVTAS ET ADVERSVS DOGMATIS CATHOLICI HOSTES EXACTAS ALOISIVS VINCENZI LITTERARVM HEBRAICARVM PROFESSOR. D. D. PROLOGUS Si scriptor, quicumque sit, res easdem iterare ab aliis tractatas plerumque molestias lectoribus affert; tantumdem arduum est scriptori novas prodere in vulgus opiniones, quae veterum placitis adversentur, praesertim ubi agatur de argumentis, in quibus laborarunt viri sapientia, eruditione et pietate illustres, ita ut videretur temeritas dubitare ac amplius contradicere dictis tam asseveranter et longa annorum serie acceptis probatisque. Nihilominus inter cetera quandoque tales subeunt in Ecclesia circumstantiae, ut fere necesse sit novum insumere examen, novumque inire experimentum circa ejusmodi opinionum vim: eoque magis cum istae videantur minus aptae ad refellendos errores recentiorum; qui quotidie rimantur occasiones in dogmatis catholici dejectionem. Hoc autem potissimum accidit in argumento de Pontificis Romani jurisdictione supra totius orbis christiani episcopatum, ejusdemque veluti consequentia necessaria infallibilitate personali in rebus fidei et morum judicandis confirmata in Concilio Vaticano. Nemo sane nescit, quanto ardore Ecclesiae Catholicae cujusque generis hostes sive haeretici, seu schismatici, aut rationalistae, non exclusis pluribus bona vel mala fide orthodoxis, animose insurrexerint adversus hanc definitionem. Idcirco pro viribus meis hanc volens una cum ceteris aggredi quaestionem, si forte aliquid boni Christi Ecclesiae et in animarum salutem comparare valeam, ac una considerans contradictionum momentum, quibus veluti loricis armantur adversarii, exorsi a primorum Patrum monumentis, unde arbitrati sunt vires sibi sufficere ad hujus dogmatis expugnationem, ita horum secutus vestigia, nitar ejusdem aetatis perscrutari traditionem et scripta, incipiens a beati Petri Pontificatu usque |