QUÆSTIONES ANNO 1899

COLLATIONIBUS THEOLOGICIS DISCUTIENDÆ IN ARCHIDIŒCESI QUEBECENSI

MENSE JANUARIO

(Legatur articulus «Conférences ecclésiastiques » in Disciplina)

Titius, sacerdos, inter protestantes habitans qui tum verbis tum scriptis doctrinam catholicam de Sanctissimo altaris Sacrificio impugnant, consilium mente concipit aliquod opusculum scribendi ad eorum errores confutandos. Hinc quærit a theologo quibusnam argumentis demonstrari possit :

10 Missæ sacrificium in Veteri Testamento præfiguratum et prænuntiatum fuisse ;

20 Christum illud in ultima cœna instituisse;

30 Apostolos de eo mentionem in suis epistolis fecisse;

40 Patres Ecclesiæ, Liturgias antiquas et Concilia idem distinctis verbis celebrasse.

De sanctissimo Rosario B. M. Virginis quæritur:

10 Quænam indulgentiæ recitationi Rosarii adnexæ sint? 20 Quænam sint conditiones ad lucrandas prædictas indulgentias requisitæ ?

30 Cuinam competat potestas erigendi Sodalitatem SS. Rosarii? 40 Quomodo fieri debeat receptio fidelium in hanc sodalitatem, et quænam sint conditiones adimplendæ ut fideles indulgentias sodalitati adnexas lucrari queant?

MENSE MAIO

Adversus anglicanos episcopos qui inter se gravia dissidia palam exhibuerunt de possibilitate secundi matrimonii contrahendi ab iis qui divortium civile obtinuerunt, Sempronius conciones habere intendit de indissolubilitate matrimonii. Ideo quærit argumenta validissima quibus probari possint sequentes propositiones:

10 Matrimonium jure naturali et divino indissolubile est ;

20 Matrimonium ab infidelibus legitime contractum dissolvi potest quoad vinculum si, alterutro conjuge ad fidem converso, nolit alter cum eo pacifice vivere vel non consentiat habitare sine contumelia Creatoris ;

30 Matrimonium ratum, non consummatum, per solemnem religionis professionem unius conjugum dirimitur;

40 Matrimonium consummatum fidelium nulla unquam de causa, ne adulterii quidem, dissolvi potest quoad vinculum.

De scapularibus in genere quæritur:

10 Ex quanam materia conficienda sint?

20 Quot et quænam sint conditiones essentiales admissionis fidelium?

30 Quomodo et quando gestari debeant scapularia?

MENSE JULIO

Sempronius, confessarius, anxius hæret de modo quo agere debeat cum iis pœnitentibus qui matrimonium invalide contraxisse deteguntur. Adsunt enim, inquit, 1 nonnulli qui bona fide matrimonium contraxerunt invalide et in ea perseverant; 20 alii qui bona fide contraxerunt et in ea non perseverant; 30 alii qui mala fide contraxerunt cum impedimento dirimente matrimonium; 40 tandem alii qui dubia fide cum impedimento contraxerunt.

Quænam agendi ratio consulenda est Sempronio in his diversis casibus ?

Titius, neo-parochus, vehementer dolet de vita parum christiana juvenum in sua parochia. - Adolescentuli enim non pauci ebrietati, blasphemiæ, colloquiis obscenis dediti sunt; intersunt missæ, ut mos est, diebus dominicis, sed parum orant et raro ad sacram communionem accedunt, exemplum præsertim parentum in hoc sequentes. Puellæ majorem pietatem habere videntur, sed utuntur et abutuntur libertate quam parentes ipsis ultro concedunt, nempe remanendi solæ sive in viis sive in cubiculis domus paternæ cum juvenibus qui eas frequentant: Quærit quibusnam præcipuis remediis hujusmodi malis -occurrere posset?

MENSE OCTOBRI

(Fit electio secretarii per scrutinium secretum) Julius, missionarius, in regione commoratur in qua reperiuntur non solum boni catholici, sed etiam pessimi christiani, imo ethnici, hæretici et schismatici qui de baptismo proli suæ conferendo parum curant. Diversi casus sese offerunt in quibus nescit quid prudenter agendum sit. Hinc quærit an, extra morlis periculum, baptizare debeat,

10 Infantes quorum parentes sunt pessimi catholici, et qui perversioni in familia exponentur ?

20 Filios parentum quorum alteruter tantum est catholicus? 30 Filios gentilium, invitis vel etiam consentientibus parentibus? 40 Filios hæreticorum et schismaticorum? Quærit etiam

50 Quandonam talibus infantibus in periculo mortis constitutis -concedendum vel denegandum sit baptisma?

Jacobus ægrotus post manuum et ante pedum ac renum unctionem, visus est omnibus adstantibus jam spiritum emisisse.

Hinc sacerdos Joannes a duabus prædictis unctionibus perficiendis abstinuit. Verum post horæ quadrantem animadvertit ægrotum adhuc vivere. Quærit quid sibi faciendum esset?

Parochus administrans extremam unctionem in casu urgentis necessitatis, cum Rituale præ manibus non haberet, hanc adhibet formam: Ungo te oleo sancto, et per suam misericordiam indul geat tibi Deus etc.

An valide egit?