emplaribus alterum Vicario tradendum, qui idem ad Sedem Apostolicam transmittat; alterum vero ad Metropolitanum, cujus munus erit idem ad Suffraganeos suos Episcopos in unum congregatos referre. Quaecumque jura, privilegia, et munera supra recensentur tanquam Praesidi conventus propria, eadem, Sede Metropolitana vacante, Seniori Provinciae Suffraganeo communicari volumus.

Episcopis Provinciae, Praeside Metropolitano, aut ipsius defectu Seniore Provinciae Suffraganeo in unum congregatis, et narratione authentica supra memorata coram ipsis prolata, de eadem coram Deo judicium sententiamque ferent. Praeses Episcoporum Suffraganeorum sententiam de meritis trium Sacerdotum, qui sedi Apostolicae commendantur, literis consignatam, uniuscujusque Episcopi et Praesidis manu subscriptam, sigilloque munitam, ad Sedem Apostolicam transmittet. Semel peracta commendatione, si Episcopi judicaverint tres illos commendatos minus dignos esse, quorum unus ad Episcopatum promoveatur, tunc quin detur novae commendationi locus, Summus Pontifex pro sua sapientia, viduatae ecclesiae providebit.

Si agatur de Episcopo Coadjutore, cum jure successionis cuivis Episcopo assignando, eadem, quae, sede vacante, commendandi forma servanda est, cauto tamen varia privilegia, jura et munera Metropolitano, aut Seniori Episcopi Suffraganeo jam attributa, ad Archiepiscopum, aut Episcopum cui coadjutor assignandus est, unice pertinere, illaeso tamen servato jure Metropolitani, quando Suffraganei ejus Episcopi ad ferendum suffragium convenerint. Tandem quicumque Sedis Apostolicae approbationi commendentur, cives sint indigenae Hiberniae, Serenissimo Imperii Britannici Regi fidelitate incorrupta obstricti, morum integritate, pietate, doctrina, ceterisque quae Episcopum decent, dotibus insigniti.

Haec sunt, quae in commendandis Sedi Apostolicae Sa

cerdotibus pro episcoporum Hiberniae electione, Sacra Congregatio servanda praescripsit. Ea vero decernens, significari omnibus voluit, in documentis de hac re pertractantibus, ad Sanctam Sedem transmittendis, nihil inveniri debere, quod electionem, postulationem, nominationem innuat, sed simplicem commendationem: memorata praeterea documenta esse debere jussit, in forma supplicis libelli ita concepti, ut inde pateat nullam in Sanctam Sedem inferri obligationem eligendi unum ex commendatis.

Declaravit denique Sacra Congregatio, salvam semper atque illaesam manere debere, Sedis Apostolicae libertatem in eligendis Episcopis, ita ut commendationes, lumen tantum, et cognitionem Sacrae Congregationi, nunquam tamen obligationem sint allaturae.

Datum Romae ex Aedibus dic. Sac. Congregationis die 17 Octobris, 1829.

Gratis sine ulla omnino solutione quocumque titulo.

D. M. CARD. CAPPELLARI,
Praefectus.

C. CASTRACANE, Secretarius.

II.

DE EPISCOPIS IN HIBERNIA SELIGENDIS.

ILLUSTRISSIME AC REVERENDISSIME DOMINE

Initum a Sacra Congregatione consilium ut certam methodum in regno Hiberniae servandam decerneret circa sacerdotes commendandos Apostolicae Sedi quando agitur de episcoporum electione in eo totum versatum est ut memorata methodo accurate servata Apostolica Sedes explora

tam notitiam habere possit meritorum sacerdotum pro quibus commendationes afferuntur. Quare Sacra Congregatio in decreto quod die prima Junii anno 1829 ea de re factum fuerat ac die 17 Octobris ejusdem anni promulgatum est, declaravit mentem suam esse ut commendationes illae lumen tantum ac cognitionem sibi compararent circa eos inter quos Apostolica Sedes episcopos est electura. Voluit quidem diocesanum clerum consuli atque ejusdem opinionem circa sacerdotes commendandos per secreta suffragia requiri. Id autem ea tantum de causa factum est, ut sanctae Sedi constaret quinam praecipue sacerdotes aestimationem obtineant cleri dioecesani, et tale testimonium consequantur ex quo intelligi posset eos apud diocesanum clerum ad episcopatum consequendum idoneos censeri. Hoc vero unico scrutinio fieri posse manifestum est, et revera decreti superius memorati contextus hic est, ut in uno tantum scrutinio res peragatur atque ex eo scrutinio constet quinam sint tres sacerdotes in quos major suffragiorum numerus convenerit.

Ad Sacrae Congregationis notitiam nuper pervenit in aliquibus Hiberniae dioecesibus hoc obtinuisse ut in conventibus qui habentur a clero diocesano ad sacerdotes sanctae Sedi commendandos ex quibus episcopus aliquis eligatur non unum sed tria fiant: intelligens Sacra Congregatio hinc evenire posse ut non tres praestantiores ex clero, sed unus revera commendetur atque ei duo alii veluti ad formam tantum adjungantur meritis omnino inferiores; cupiens praeterea eadem Sacra Congregatio ubique in Hibernia eamdem methodum circa ejusmodi commendationes servari scribendum judicavit Amplitudini Tuae hanc epistolam caeteris Archiepiscopis communicandam ut in dioecesibus omnibus Hiberniae constet unicum scrutinium in conventibus cleri peragendum esse ad tres sacerdotes sanctae Sedi commendandos antequam ipsa deveniat ad episcopi alicujus

Hiberniae dioecesis electionem, et hunc verum decreti diei 1 Junii 1829 sensum esse. Precor Deum interea ut amplitudinem Tuam diu sospitem ac felicem servet. Romae ex aed. S. C. de Prop. Fide, die 25 Aprilis, 1835,

Amplitudinis tuae

Ad Officia Paratissimus,

J. CH. CARD. FRANSONIUS, Praef.

A. MAIUS, Secretarius.

R. P. D. DANIELI MURRAY,

Archiepiscopo Dublinensi,

Dublinum.

P.S.-In Decreto recentiori S. Congregationis de Prop. Fide statutum est ut conventus Episcoporum provinciae qui sententiam dicere debent de meritis trium sacerdotum a clero selectorum teneatur decem diebus post conventum cleri ipsius.

APPENDIX XIII.
[Ad. pag. 101, n. 143.]

DE SOLEMNITATIBUS SYNODALIBUS. Cum Archiepiscopi et Episcopi Hiberniae in concilio Plenario Maynutiano congregati, eo animo, ut Synodos sive Dioecesanas sive Provinciales statis temporibus, ut par est, in posterum celebrare faciliori modo possint, a S. Sede demisse flagitaverint, ut ipsis eosdem conventus omissis nonnullis ex debitis solemnitatibus inire liceat; SSmus Dominus Noster Pius Divina Providentia PP. IX., referente me infrascripto Sacrae Congregationis de Propaganda Fide Pro-Secretario in audientia 6 Augusti c. an. praehabita sententia Emorum PP. ejusdem S. Consilii, ac perpensis peculiaribus Ecclesiarum in memorato Regno circumstantiis, petitam facultatem ad decennium benigne impertiri dignatus est, ita tamen ut Pontificalis Romani, ac Caeremonialis Episcoporum praescriptiones saltem in substantialibus serventur.

Contrariis quibuscumque haud obstantibus.

Datum Romae ex Aed. S. Congregationis de Propaganda Fide die 1 Septembris 1876.

ALEXANDER CARD. FRANCHI, Praef.

J. B. AGNOZZI, P. Secret.

LOC. SIG.