EDITOR RATISBONENSIS LECTORI. Theologiam moralem R. P. Gury iterum prelo subjicientes, verba clarissimi auctoris praesertim juxta editionem Romae 1862. evulgatam lectori praebemus. Cum tamen 1866. recentior romana editio, notis amplis P. Antonii Ballerini S. J., in collegio romano professoris, illustrata prodierit, etiam hujus, statim ac ad nostras manus pervenerat, in secunda operis parte, rationem habuimus. Adnotationes auctoris vero et illas editoris romani, quas adjungere opportunum duximus, a nostris per appositionem Not. auct. vel Not. edit. rom. sedulo distinximus. Additamenta porro nostra ex libris probatissimis deprompsimus, praesertim vero ex theologia morali S. Alphonsi de Ligorio (edit. Ratisb. 1846.) ad mentem auctoris ipsius. Libenter etiam theologia morali Petri Scavini (edit. 7. Mediol. 1857-1858. et edit. 10a. ib. 1865.) usi sumus ob similitudinem operis auctoritatemque, qua gaudet. Insuper curae nobis fuit, recentiores maxime decisiones S. Sedis suo loco inserere vel opera, in quibus prostant, indicare. Principia juris austriaci, quae jam in secunda editione germanica habentur, juxta multorum votum etiam notis hujus quartae inseruimus, sperantes, ea, sicuti principia juris gallici ab auctore proposita, si non omnibus, prouti jacent, inservire possunt, saltem uti exempla quaedam non prorsus superflua fore: in permultis enim jura recentiora concordant. Longe autem fines hujus libri excederet, jura particularia, non dico omnia, sed vel plura inserere; labor etiam ex magna parte inutilis, cum coaevos nostros passim intentos videamus, codicibus vetustioribus recentiores substituere. De reliquo lector adnotationes, quae principia juris austriaci continent, per asteriscum appositum facile a ceteris discernet. Quoad modum citandi auctores haec pauca: Paragraphis ex opere S. Alphonsi de Ligorio titulus tractatus, non numerus libri subnectitur, eum ordo librorum in editionibus diversus sit; in citationibus vero ex libro Scavini raro locum specialius designavimus, cum citationes ex vetustioribus editionibus dicti operis prolixiores esse deberent, editiones inter VI se discrepent et, quae investigantur, sine labore vel in tractatu ejusdem tituli, vel saltem in indice inveniri queant. Pro citatione catechismi romani editio Vindobonensis anni 1850. prae manibus fuit. Si tandem paragraphos ex auctore nostro attulimus et numerum partis non addidimus, eam ipsam partem subintellige, in qua dictus numerus profertur. Speramus, etiam hanc quartam editionem, uti tertiam, clero et theologiae studiosis gratam fore. Quam si utilem sibi repererint, auctoris quoque adeo bene meriti, qui interea mortem cum vita commutavit, animo christiano recordentur. Ratisbonae, 1868. |