DE

PECCATO ORIGINALI,

EJUSQUE

NATURA, AC TRADUCE, ET PŒNA:

DEQUE MULTIPLICI STATU HOMINIS, INNOCENTIS, LAPSI, REPARATIQUE,

AC DE POSSIBILI PURE NATURE STATU:

TRACTATUS THEOLOGICUS:

IN QUO HÆRESUM HISTORIA DILIGENTIUS ENARRATUR, VINDICANTUR FIDEI
CATHOLICE DOGMATA, AC SOLIDIORES QUÆ AGI SOLENT IN SCHOLIS, JUXTA
S. THOMÆ AQUINATIS DOCTRINAM DIRIMUNTUR QUÆSTIONES:

AUCTORE

FR. JO. FRANC. BERNARDO M. DE RUBEIS

ORDINIS PRÆDICATORUM.

SUPERIORIBUS ANNUENTIBUS.

RECUSUS

AD EDITIONEM PRIMARIAM VENETAM MDCCLVII

APUD SIMONEM OCCHI

WIRCEBURGI,

SUMPTIBUS STAHELIANIS.

1857.

110.6.116.

WIRCEBURGI, TYPIS F. E. THEIN.

PRÆFATIO.

Totius Christianae Fidei summam brevi nobili sententia complectitur Sanctus Augustinus Libro de Peccato Originali Capite XXIV. num. 28. In causa duorum hominum, inquiens: quorum per unum venumdati sumus sub peccato, per alterum redimimur a peccato: per unum praecipitati sumus in mortem, per alterum liberamur ad vitam: quorum ille nos in se perdidit faciendo voluntatem suam, et non ejus a quo factus est; iste nos in se salvos facit non faciendo voluntatem suam, sed ejus a quo missus est: in horum ergo duorum hominum causa proprie Fides Christiana consistit. Unus est enim Deus, et unus mediator Dei et hominum Christus Jesus. Augustinianae sententiae praeclarissimae partem primam versat, ac illustrat Theologicus Tractatus, qui prodit in lucem: ac omnia, quae in eo uberrime pertractantur, indicat argumenta praecipua Frons ejus. Insurrexerunt per tempora indociles, vanique homines, qui fundamentum hocce Christianae Religionis impetere variis directis, indirectisque absurdissimis commentis ausi sunt. Sempiterna principia duo, boni alterum, et alterum mali, invexerunt Gnostici, et Manichaei: animarum praeexistentiam, quae in superiore vita prolapsae, justitia vindice detruderentur in corpora, excogitavit Origenes cum suis: Adae posteros nasci innocentes, ac peccati omnis immunes, dixere Pelagius, et Caelestius, qui praeformatum a Theodoro Mopsuesteno, non ab ullo Rufino quopiam, praecipue Aquilejensi, impium errorem amplificarunt: et hanc demum haeresim, culpae traduce sublato, admisso poenae transitu, emollire Julianus Eclani Episcopus, et Complices studuerunt. Hujusmodi Haereticorum, ac Haeresum, quas ipsi cuderunt, originem, incrementa, vices, fata, obitum aliquando, ac