Testis erit Liger, Arvernis qui fusus ab antris Libera devexum per loca findit iter. Interea patrem, Campanaque tecta revise, Debitaque auspiciis, hei mihi, regna tuis; Debita, sed fatis cito jam cessura malignis ; Evertet tantas quum ferus hostis opes.
Dii maris Etrusci, per quos Tiberinus, et Arnus, Macraque cæruleis jungitur altus aquis,
Dum redit in patriam juvenis, tot honoribus auctus, Candida felici solvite vela Noto.
Vosque, cita puppes, jussum properate per æquor; Fata dabunt istas sæpe iterare vias:
Nec semel hos tractus, Ligurumque videbitis oras, Aut Vari infaustum fluminis hospitium; Vallatosque sinus scopulis, Toroëntia claustra, Et sparsas mediis Stochadas æquoribus; Denique Phocaïcosque sinus, Marioque refossum Littus, et antiquæ monia Massiliæ, Donec fatales Turonum accedere muros Permittant vestro fata sinistra duci.
Ah Liger, ah nimium lacrimis urgende meorum, Qualia spectabis flumine busta tuo!
Busta, quibus magni ponant diademata reges, Grataque solenni flore parentet humus ; Atque aliquis Latio veniens novus hospes ab orbe, Portet honoratas munus ad inferias;
Et dicat: Federice, tuorum hic meta laborum Hæsit; habet nostros hæc brevis urna deos.
DE MIRABILI URBE VENETIIS.
VIDERAT Hadriacis Venetam Neptunus in undis Stare urbem, et toto ponere jura mari : Nunc mihi Tarpeias quantumvis, Jupiter, arces Objice, et illa tui mœnia Martis, ait:
Si Pelago Tybrim præfers, urbem aspice utramque ; Illam homines dices, hanc posuisse deos.
RUPIS o sacræ pelagique custos,
Villa, Nympharum domus, et propinquæ Doridos, Regum decus una quondam Deliciæque,
Nunc meis tantum requies camœnis, Urbis invisas quoties querelas, Et parum fidos popularis auræ Linquimus æstus !
Tu mihi solos nemorum recessus Das, et hærentes per opaca laurus Saxa; tu fontes, Aganippidumque Antra recludis.
Nam simul tete repeto, tuasque Sedulus mecum veneror Napæas,
Colle, Mergillina, tuo repente Pegasis unda
Effluit, de qua chorus ipse Phœbi, Et chori Phoebus pater atque princeps, Nititur plures mihi jam canenti Ducere rivos.
Ergo tu nobis Helicon, et udæ Phocidos saltus, hederisque opacum Thespiæ rupis nemus, et canoro Vertice Pindus.
I, puer, blandi comitem laboris Affer e prima citharam columna, Affer et flores, procul omnis a me Cura recedat.
Principis nostri decus, atque laudes Fama, per latas spatiata terras, Evehat, qua Sol oriens cadensque Fræna retorquet ;
Quaque non notos populos et urbes Damnat æternis Helice pruinis, Quaque ferventis cumulos arenæ Dissipat Auster.
Ille crescentes veneratus annos
Vatis, antiquum referentis ortum
Stirpis, et clarum genus, et potentum Nomen avorum,
Contulit larga numerosa dextra
Dona, et ignava stimulos juventæ,
Addidit, silvas et amica Musis
CUM vehor picta vacuus phaselo, Et modo septos jaculis echinos, Nunc bene hærentes scopulis laboro Vellere conchas;
Tange vocales studiosa chordas,
Musa, et auratum moderare plectrum : Pauca de multis referamus acta Regis amati.
Qualis herboso spatiata campo
Virgo, jam matris decus et voluptas, Nectit e solis violis coronam,
Cætera linquens.
Hic ubi veras imitata turres
Tot simul pinnis, niveisque tectis,
Rupe Mergillina sedens, propinquum Spectat in æquor,
Adsit ex imo Galatea fundo,
Nil timens sævos Polyphemi amores,
Nec mihi durum refluens canenti Obstrepat unda.
Sit licet magnus, trepidasque turmas Fregerit primis Federicus ausis,
Cum puer celsas penetravit Alpes, Saxaque Rheni;
Texerit latis pelagus carinis, Dalmatûm dites populatus urbes; Senserit presso prope fulminantem Ore Timavus;
Cinxerit sacra meritum corona
Et caput, Gallos quoniam feroces Contudit; totas revocarit orci ex Faucibus urbes:
Nil tamen majus, nihil egit unquam Fortius, quam quod, titubante regno, Cum sibi sceptrum et diadema posset Sumere tutus,
Conjugem charam propriosque natos Liquit, et fidas lacrimas clientum, Fratris heu pulsam sobolem secutus Per mare vastum,
Ergo nunc illi moderator alti
Ætheris, cui sunt pia facta curæ, Regium frontis decus et negatos Addit honores.
O Fides, rarum placidumque numen, O mihi nullis reticenda sæclis,
Te te ego æternum prece victimisque Pronus adorem.
« ÖncekiDevam » |