fidelibus exponant doctrinam Ecclesiæ de Purgatorio; debent insuper devotioni erga patientem Ecclesiam et prædicandæ et inculcandæ et exercendæ sedulo incumbere; experientia enim constat animarum rectorem, hac devotione, suis ovibus adhuc in via plurimum prodesse, earumque saluti consulere. Ubicumque fervet charitas erga defunctos, hic reviviscunt fides et spes immortalitatis beatæ, quas virtutes omnium cordibus alte infixas tam ardenter exoptaremus.

Quapropter ad hunc finem tam salutarem assequendum vehementer adhortamur parochos :

1° Ut curent in sepulturæ cæremoniis omnia fieri pie et devote juxta ordinem præscriptum;

2o Ut de monumentis in defunctorum memoriam erectis sollicite pro suo posse vigilent : ista enim monumenta sancta Cruce et inscriptionibus fidem et spem christianam spirantibus insigniri optandum est, et ab eis symbola religione indigna debent amoveri;

3° Ut aliquoties in anno, si existat in cœmeterio oratorium publicum, Missæ sacrosanctum sacrificium ibi celebrent, postquam, Dominica præcedente, fideles monuerint;

4° Ut in parœciis, ubi cœmeterium Ecclesiæ adhuc contiguum est, inducant seu confirment laudabilem usum ad sepulcra preces aliquas effundendi sive ante sive post divina officia;

5° Ut in Commemoratione omnium defunctorum ad cœmeteria adeant processionnaliter, si locorum proximitas permittat, et sermonem ad populum habeant;

6° Ut partem suæ gregis, quæ vitam christianam

modo perfectiori amplectitur, ad applicandas mortuis, sive sanctam communionem, sive indulgentias Viæ Crucis aut alias, pro prudentia, incitare studeant;

7° Ut Sacerdotes pias sodalitates precum pro mortuis, sive inter se, sive inter fideles promoveant, vel jam erectas servare conentur.

CAPUT XVII.

DE PROMULGATIONE DECRETORUM HUJUS

CONCILII PROVINCIALIS.

Decreta hujus Synodi provincialis nemo prælo subjiciat aut promulget, antequam a Sancta Sede Apostolica, juxta Constitutionem Sixti V, quæ incipit, Immensa, recognita fuerint. Litteris autem. quibus illa confirmentur a Sanctitate sua obtentis, ea statim imprimantur, impressaque a singulis Episcopis vel in Synodo diœcesana, vel si celebrari nequeat, extra Synodum quamprimum promulgentur.

CAPUT XVIII.

DE INDICTIONE FUTURI CONCILII PROVINCIALIS.

Cum sacrosanctæ Synodi Tridentina decretis statutum sit, ut quolibet saltem triennio celebrentur concilia provincialia, ut Ecclesiæ menti obsequamur, NOS, THOMAS-MARIA-JOSEPHUS, S. E. R. tituli Sancti Callixti presbyter Cardinalis GOUSSET, Archiepiscopus Re

mensis, de consilio et consensu Reverendissimorum Episcoporum comprovincialium, proximum Concilium hujus Provinciæ in Ecclesia cathedrali Bellovacensi, anno 1860, celebrandum jam denuntiamus, et indicimus omnibus qui præsentes adesse debent.

SUBSCRIPTIONES EPISCOPORUM.

NOS, THOMAS, S. E. R. presbyter Cardinalis GOUSSET, Archiepiscopus Remensis, hæc decreta a nobis definita subscripsimus.

†TH. Card. GOUSSET.

Ego, Episcopus Bellovacensis, Noviomensis et Sylvanectensis, hæc decreta a nobis definita subscripsi. JOS.-AR., Episc. Bellov., Noviom. et Sylv.

Ego, Episcopus Suessionensis et Laudunensis, hæc decreta a nobis definita subscripsi.

† PAULUS-ARM., Ep. Suessionensis et Laudunensis. Ego, Episcopus Ambianensis, hæc decreta a nobis definita subscripsi.

† JACOBUS-ANT., Episcop. Ambian.

Ego, JOANNES-HONORATUS, Episcopus Medensis, Coadjutor R. Episcopi Catalaunensis, subscripsi.

† J.-HONORATUS, Episc. Meden., Coadj. RR. Episc. Catalaunensis.

APPENDIX.

I

DOMINO NOSTRO DOMINO SANCTISSIMO PATRI PIO PAPÆ IX

Beatissime Pater,

Volentes sacrosancti Concilii Tridentini de Synodorum celebratione præcepto satisfacere, necnon, in quantum, pro temporum et locorum ratione fieri potest, jam a pluribus annis apud nos feliciter incœptum de instauranda disciplina Ecclesiastica opus perficere, venerabiles Episcopi Provincia Remensis, rite convocati, in Remorum civitatem convenerunt, ac in Ecclesia Metropolitana una nobiscum solemniter Synodum inierunt, octava decima die Novembris hujus anni MDCCC LVII; quam et absolverunt ejusdem mensis die vigesima quinta, servatis Pontificalis Romani præscriptionibus.

Cum autem concilii cujusvis acta non possint plenam fidelibus securitatem afferre, nec optandam firmitatem obtinere, nisi confirmata aut approbata fuerint a Sede Apostolica, Sixti Papæ V Constitutioni Immensa æterni obsequentes, ea quæ statuenda duximus, ad Sanctitatem Vestram transmittere properamus, ut Illa jubeat a Sacra Congregatione Concilii examinari, re