provinciæ deputatis, et Episcoporum Theologis et Canonistis. Sedebant a parte Epistolæ, R.R. D.D. Episcopus Bellovacensis, R.R. D.D. Episcopus Ambianensis, R.R. D.D. Episcopus Ludovillensis, et a parte Evangelii R.R. D.D. Episcopus Suessionensis, R.R.D.D. Episcopus Adjacensis, R. D. Procurator R.R. D.D. Episcopi Catalaunensis. Et ultra, hinc et inde, progrediendo versus navim, Canonici et Theologi. Decanus et Capitulum Ecclesiæ Cathedralis Ambianensis circum altaria assistebant. In inferiori gradu, pone Concilii Patres, Canonicos et Theologos, locus erat Parochis civitatis, Archipresbyteris et Decanis ruralibus, et paululum retro, cæteris præsbyteris.

Eminentissimus ac Reverendissimus Cardinalis GOUSSET Archiepiscopus Remensis, sacra fecit, Præsbytero assistente R. D. QUERRY, Vicario generali Remensi; Diaconis assistentibus, R.R. D.D. GERBET, Vicario generali Remensi, et CONGNET, Canonico Suessionensi; Diacono et Subdiacono Missæ R.R. D.D. BEGIN, Canonico Catalaunensi, et Eduardo JOURDAIN, Canonico Ambianensi.

Inter sacra quotquot aderant Episcopi, Capitulorum Procuratores, Theologi et Canonistæ divinam Eucharistiam acceperunt e manibus Eminentissimi Cardinalis celebrantis.

Post Missam, et ritibus sessionis solemnis juxta Pontificale peractis, R.R. D.D. Promotores Concilii, præcedentibus Cæremoniarum Magistris, instantiam fecerunt ut decreta, si quæ essent, legerentur.

Accepto folio in quo continebantur decreta, unus e Secretariis in concionem ascendit, et promulgavit :

1° Decretum de Conciliis provincialibus.

2o Præambula Decreti de scholis et educatione.

3o Decretum de cultu Angelorum.

Insuper declaravit alia decreta, ne longius protrahatur præsens cæremonia, die sequenti in sacello puerorum catechisandorum proclamanda esse.

Finita promulgatione, Secretarius ad Metropolitanum accedens

ab illo quæsivit utrum decreta placerent. Qui respondit: Placent. Et cum eidem quæstioni Patres Concilii et Procurator DD. Episcopi Catalaunensis idem responsum dedissent, dixit Metropolitanus: Decreta placuerunt Patribus, Deo gratias.

Tunc e suggestu Ecclesiæ E.E. et R.R. Cardinalis Archiepiscopus ad populum habuit paternam concionem de his quæ in Concilii cætibus peracta sunt.

Deinde solemnes acclamationes ab eodem suggestu cecinit Præsbyter delegatus, quibus omnes ore animoque uno responderunt. Et Hymno Te Deum dicto, clerum populumque benedixit Eminentissimus Metropolitanus.

Ad ædes Episcopales cum Psalmis et Canticis, aut pulsantibus organis, Ecclesiam obambulans, regressa est sacra Processio.

CONTINUATIO SESSIONIS SECUNDÆ.

Die decima nona januarii continuata est sessio secunda in sacello Cathedralis Ecclesiæ adjacenti, in qua consedere, sicut præcedenti die, Patres Concilii, Procurator Episcopi Catalaunensis, Canonici et Theologi, et præsentes fuere R.R. D.D. Episcopus Adjacensis, Capitulum Ambianense, Parochi civitatis, multique Ecclesiastici viri tam e civitate quam e diversis Diocesis partibus. Ritibus peractis, lecta sunt a suggestu decreta quorum sequitur 'titulus :

1o De quibusdam pravis opinionibus jura Sanctæ Sedis lædentibus. 2o De consuetudinibus in Provincia Remensi existentibus. 3o De piis fundationibus.

4 De absolutione Sacramentali.

5o De Ordinum Monasticorum piarumque Congregationum cum Sancta Sede relationibus.

6° De cultu Sacratissimi Cordis Jesu.

7° De cultu Immaculati Cordis Mariæ.

8° De quibusdam piis exercitiis et confraternitatibus.

9° De charitatis et misericordiæ operibus.

10° De scriptoribus catholicis.

11° De studiis litterariis. - De historia. - De philosophia. Postquam Illustrissimi et Reverendissimi Patres, et R. D. Procurator R.R. D.D. Episcopi Catalaunensis, hæc omnia decreta sibi placere per vices declaraverint, Eminentissimus Metropolitanus denuntiavit futurum Concilium provinciale in Ecclesia Metropolitana, anno 1856, celebrandum.

Et dictus est Hymnus pro gratiarum actione, simul ac Patres Concilii et Procurator ante dictus constitutiones Synodales super altare explicatas subscripserunt.

CONCILII PROVINCIÆ REMENSIS.

CAPUT PRIMUM.

Decretum de Aperienda Synodo.

In nomine Sanctissimæ et Individuæ Trinitatis, Patris et Filii et Spiritus Sancti.

NOS THOMAS-MARIA-JOSEPHUS Sanctæ Romanæ Ecclesiæ tituli S. Callixti Presbyter Cardinalis GOUSSET, Archiepiscopus Remensis, ad laudem et gloriam Dei et Salvatoris nostri Jesu Christi; ad honorem Beatissimæ et Immaculatæ semperque Virginis Mariæ Dei genitricis, sanctorumque Angelorum, nec non sancti Petri Apostolorum principis, omniumque Sanctorum qui provinciam hanc illustrarunt, ad Remensis, Catalaunensis, Bellovacensis, Suessionensis et Ambianensis Ecclesiarum decorem, statuimus ac decernimus, de consilio et consensu Reverendissimorum Episcoporum nostrorum Comprovincialium, hac ipsa die decima januarii inchoari, atque adeo inchoatum esse Concilium provinciale, quod nostra metropolitana auctoritate indiximus, et convocavimus; Jesum Chris