PRÆFATIO.

Opus de Theologia dogmatica ante annos fere viginti in lucem primo editum, iterum prelo subjicere statui, exemplaribus jam divenditis. Studium doctrinam accurate exponendi et firmandi argumentis, explosis adversariorum erroribus, Summo Præsuli placuisse testantur litteræ Gregorii XVI. sanctæ memoriæ; quod et comprobarunt alii munere et eruditione insignes. Questi sunt quidam stylum aliquanto difficiliorem et a scholæ consuetudine alienum sed verborum barbariem nil conferre putavi, et ratiocinii formas exercitationi studiosorum relinquere satius duxi. Quod ad rerum divisionem et argumentorum vim pertinet, satis me ordini lucido consuluisse existimo, et probationum, sicut et difficultatum, vim exposuisse, quin scholasticorum arctius premerem vestigia, sæculi quo vivimus hominibus morem gerens. Ex ipsis sectarum libris objectiones plerumque exscripsi, quas et exsufflavi, singulis diligentius satisfaciendo. Patrum testimonia innumera collegi, non quod omnia memoriæ mandanda putem, sed ut studiosi ad manus

habeant quibus pro opportunitate utantur; plerisque enim non suppetunt ipsa antiquorum scripta. A sententiarum quæ in scholis in utramque partem libere agitantur discussione consulto abstinui, dogmatum intentus vindiciis haud tamen meam celavi mentem in iis quæ momenti gravioris visæ sunt, aliis aliter sentiendi libertate illæsa. In nova hac editione aliqua adjeci, præsertim quæ ad dogma de immaculato Virginis conceptu a Pontifice nuper definitum vindicandum attinent. Patrum etiam catalogum confeci, operibus eorum a supposititiis sedulo distinctis. Quamvis autem in usum cleri Statuum Foederatorum mea hæc qualiacumque scripta præsertim directa sint, cessi tamen Præsulum quorumdam consiliis ea iterum edendo ex prelo Europæo, ut doctrinæ fideique unitas magis clarescat.

Scripsi Baltimore Maji Kal. A. D. MDCCCLVI.