possible de très bon cœur vous vouldrions faire plaisir quest. lendroit où nous prions le Créateur quil luy plaise vous augmenter en ses grâces. De Genève ce 31 daugst 1553.

F.

A noble, puissant, magniffique et trèshonoré Seigneur, le Seigneur de Maugeron nostre bien bon voisin, très chier, singulier et grand amys.

Noble, puissant, etc., nous nous recommandons bien fort à vostre bonne grâce.

Trèshonoré Seigneur, sus ce quil vous a pleu nous rescripre pour scavoir de Michel Servet nostre prisonnier quelz débiteurs il aye, certainement desirons vous faire plaisir et honneur, et non seulement à vous mays à vostre filz, et tous aultres pour lesquelz le scauriez désirer. Nous sommes incontinent transporté en la maison de noz prisons et là avons icelluy de cela dilligemment interrogué, et touteffois nen avons peu avoir réponce à vostre affaire propre, ne scavons par quelle subtilité il le faict; espérons bien touteffois de plus oultre à cela le suyvre pour lamour de vous, mais non pourtant doubtans que la chose ne soit par aventure longue envers luy navons vouluz retenir vostre serviteur présent porteur plus oultre, mays luy avons donné la présente pour nostre responce, prétendans que si pouvons sentir dudict prisonnier chose qui puysse soit à vostre Seigneurie, ou à vostre filz profiter vous en envoyer responce par messagier exprès. Ce que vous prions prendre à la bonne part comment de ceulx qui ont tout leur désir de vous faire plaisir, et que prient Dieu le Créateur il luy plaise vous augmenter en ses grâces. — De Genève, ce premier de septembre 1553.

VI. Lettres circulaires adressées, à l'occasion du procès de Servet, par le Conseil de Genève, aux Eglises et Conseils des Cantons protestants, avec les réponses des gouvernements de Zurich et de Berne (voyez pages 95 et 103).

A.

Aux spectables, scavans et honorez Seigneurs ministres de la Parolle de Dieu en l'Eglise de nos bien bons et singuliers amys.

Spectables scavans et honorés Seigneurs, nous nous recommandons bien à vostre bonne grâce.

Spectables Seigneurs Bien seurs et certains que vous persistez tousjours en ceste bonne et saincte volunté davancer et maintenir la parolle de Dieu, nous avons pensé que vous ferions bien tort, si nous cèlions ce que parmy ces iours avons trouvé cest quil y a ung homme en noz prisons nommé Michiel Servetus qui sest ingéré à composer, escripre et faire imprimer des livres sus la Saincte Escripture contenans grands et infinys passaiges que prétendons nestre recepvables selon Dieu et la saincte doctrine évangélique. Lequel est esté ouy par nos ministres, et auquel pourtant sont esté formés des articles esquels il a répondu, et à ses responces est esté replicqué; il a encore replicqué luy, comment le tout est redigé par escript, lequel pour lhonneur de Dieu, nous vous prions il vous plaise veoir, puys rendre à nostre présent messagier avec vostre bon advys. Vous prions aussi de vouloir veoir lung de ses livres quavons baillé au présent porteur, pour vous communiquer, affin puissiez cognoistre que à bonne cause nous vouldrions réprimer ses maulvais

propos. Et du tout nous en rescripre vostre dit bon advys, lequel désirons grandement sans touteffois nous deffier aulcunement de noz ministres. Vous nous obligerez tousiours plus oultre à prier Dieu il lui plaise vous augmenter en ses sainctes grâces. De Genève ce 21 septembre 1553.

Les Syndiques et Conseil de Genève

Vos bien bons et grans amys.

B.

Aux magniffiques, puissans et très redoubtez Seigneurs, les Seigneurs Bourguemaistre (ou advoyer) et Conseil de ...., nos bien bons voysins, trèschers, singuliers et trèshonorés amys.

Magnifficques, Puissans et très redoubtez Seigneurs nous nous recommandons bien fort à vostre bonne grâce.

Magnifficques Seigneurs! Nous ne scavons si voz Seigneuries ont entendu que nous avons ung prisonnier, qui se nomme Michael Servetus, qui a composé, escript et faict imprimer ung livre contenant beaucoub de choses contre nostre religion. Que nous avons faict veoir à noz Ministres, mais combien que ne nous defions aucunement dyceux noz Ministres, nous desirons encore le communiquer à ceux de vostre ville sil vous plait, ensemble ses responces, et ce sus quoy il a respondu. Et pour ce leur en avons escript, nous vous prions doncque bien affectueusement quil vous plaise les vouloir induire à vouloir le tout veoir, et nous en rescripre leur bon advys, affin nous puissions la chose selon son debvoir terminer. A tant nous prierons Dieu il luy plaise vous augmenter en prospérité destat. De Genève ce 21 de septembre 1553.

Vos bien bons voysins tous prest et grans amys
Les Syndiques et Conseil de Genève.

C.

Traduction.

Aux prodhoms, prouvables, honorables et saiges les Sindicques et Conseil de Genève, nos singuliers, bien aymez et bons amys.

Notre aimable et voluntaire service avec tous les honneurs amour et amitié à nous possibles prémys, Prodhoms prouvables honorables et saiges singuliers bien aymez et bons amys, sus vostre escripre et requeste et ce quavez envoyé par deça le livre publié par votre prisonnier Michel Servet, nous avons toute la procédure délivré à noz scavans et Ministres de notre Eglise lesquelles nespargnantz aulcunement leur singulière obligence ont veu lescripre dudict Servet tant que la peu porter le temps et sus cela rédigé par escript leur advys et confession comme le verrez ycy auprès, en bonne confiance que vous recevrés linformation des nostres à singulier contentement et plaisir et ne laisseres venir en avant la meschante et faulse intention de votre dict prisonnier, laquelle est toutallement contraire à la religion chrestienne, et laquelle donne de grandz scandalles et assaulz, ains aurez aggréable et vous plaira linformation de noz scavans et leur confession de notre saincte religion chrestienne, et si à ladvenir en tels advenemens vous aviez besoing du conseil et advis des nostres trouverez iceulx et nous aussi en tous temps tres voluntaires, car nous sommes tous inclins et voluntaires à ladvancement de tout ce qui pourra servir à labolissement de faulses errales doctrines et opinions et à ladvancement de lhonneur de Dieu et de sa saincte parolle. Donné Lundy second doctobre 1553.

Burgemaistre et Conseil de la ville de Zurich.

D.

Original.

Aux nobles, magniffiques Seigneurs, les Sindicques et Conseil de Genefve, nous singuliers amys, trèschiers et feaulx combourgeois.

Nobles magnifficques Sgrs, singuliers amys très chiers et feaulx combourgeoys nous avons receuz vous lectres datées XXI de septembre touchant Michiel Servetus et ayant veuz et bien entenduz le contenuz dicelles, incontinent comme desirrez ordonné à nous ministres icy de veoir le livre et les responces dudict Servetus et après vous en escripre leur bon advis et opinions. Ce quil ont faict comme entendres par leur lectres que vous escripvent. Vous prions comme ne doubtons point à ce estre enclins de tousiours tenir main que les erreurs et sectes comme lesdict sont ou semblables ne soyent semées en lesglise de Iesu Christ nostre seul Saulveur et par ce garder de trouble et adversité, et sa gloire avancer et augmenter. Datum VI octobris 1553.

Ladvoyer et Conseil de Berne.

Les actes originaux de la Procédure proprement dite, que nous n'insérons pas dans les Pièces justificatives, trouveront leur place ailleurs.